जसपाले गौर र टिकापुर जस्तै घटना गराउन खोजेको सिके राउतको खुलासा, प्रमाण प्रहरीमा बुझाएको दावी

टुडेवाणी, कार्तिक ६ गते ।

जनकपुरधाम :  जनमत पार्टीका अध्यक्ष डा.सिके राउतले जनता समाजवादी पार्टी (जसपा) आफ्नो आन्दोलनमा घुसपैठ गराएर गौर र टीकापुर जस्तै नरसंहार घटना गराउन चाहेको दावी गरेका छन् । उनले आफ्नो आधिकारिक फेसबुक पेजमा शनिबार बिहान पोस्ट राख्दै यस्तो दावी गरेका हुन् ।

‘२०७८ कार्तिक ५ गते शुक्रबार जसपाको धनुषा बैठकबाट आधिकारिक रूपमा नै निर्णय गरिएको छ, सी के राउतको कार्यक्रममा जसपाले आफ्नो २०-२५ लठैतलाई पठाउने र प्रहरीमाथि ढुंगामुढा तथा भयावह आक्रमण गर्ने, सिके राउतले अगाडी लेखेका छन् ‘गौर र टीकापुर जस्तै घटना घटाउने, दोष जनमत पार्टीलाई लगाउने । अडियो प्रमाणमा त्यसको लागि जसपा धनुषा अध्यक्ष पशुपति यादव र युवा नेता नविन यादवलाई नामै किटेर खटाइएको सुन्न सकिन्छ।’

उनले प्रदेश २ मुख्यमन्त्री कार्यालय र स्वकीय सचिवको पनि सो कार्यक्रमा संलग्नता रहेको देखिएको दावी गरेका छन् । निर्णयको अडियो र भिडियो प्रमाण धनुषाका प्रहरी प्रमुखलाई उपलब्ध गराइएको सिके राउतले जनाएका छन् । उनले प्रहरी र प्रशासन सचेत रहोस् भन्ने आग्रह पनि गरेका छन् । सिके राउतले अगाडि लेखेका छन् ‘हामीले पटकपटक भन्दै छौं जनकपुरमा जनताले गरेको कारबाही कुनै पार्टी वा व्यवसायी विशेष विरूद्ध थिएन। सम्बन्धित परियोजनामा संलग्न व्यक्तिहरू मात्रै थिए । त्यो कारबाही गर्ने पनि आम जनता थिए, सबै पार्टीका थिए।

ज्ञापन पत्र दिने पनि सबै पिडित टोलवासी थिए, नाम र हस्ताक्षर हेर्दा हुन्छ कुनै एक पार्टीका थिएनन्। स्पष्ट रहौं।’ उनले तर त्यसलाई बहाना बनाएर जसपा र त्यसका भातृसंगठनहरूले लगातार जनमत पार्टीको सचिवालय सहित कार्यक्रमहरूमा आक्रमण गर्दै आएको दावी समेत गरेका कछन् । अब त जसपाले बैठक गरेर आधिकारिक रूपमा नै पारित गर्दै कार्यक्रममा घूसपैठ गर्ने, प्रहरीमाथि आक्रमण गर्ने र ठूलो घटना घटाउने निर्णय गरेको उनको राउतको दावी छ । यसको स्पष्टीकरण जसपाले आधिकारिक रूपमा दिनुपने राउतले बताएका छन् ।

गएको बिहीबार जनकपुर स्थित खानेपानी तथा ढलकिास कार्यालयका निमित प्रमुख राजेश कुशावहालाई जनमतका नेताकार्यकर्ताले जनकारबाहीको नामममा अर्धनग्न गरेर बजार घुमाइ अमानवीय व्यबहार गरेका थिए । सो क्रममा प्रहरीले जनमतका १७ जनालाई पक्राउ गरी मुद्दा चलाएको छ । उनीहरुलाई रिहाइको माग गर्दै जनमत पार्टीले शुक्रबार चलु जनकपुर, भरु जनकपुर कार्यक्रम गरी जिल्ला प्रशासन कार्यालय र जिल्ला प्रहरी कार्यालय घेराउन गर्ने कार्यक्रम तय गरेको थियो । प्रदर्शन गर्दै जिल्ला प्रशासन कार्यालय घेराउ गर्न पुगेका जनमतका नेताकार्यकर्तालाई प्रहरीले लाठीचार्ज गर्दै धपाएका थिए ।