धनुषामा ट्राफिक प्रहरीको नागरिक सुनुवाइ कार्यक्रम सम्पन्न, स्थानीयका गुनासा र सुझाव सुनियो

जनकपुरधाम : धनुषामा जिल्ला प्रहरी कार्यालयको आयोजनामा समुदाय–प्रहरी साझेदारीअन्तर्गत नागरिक सुनुवाइ कार्यक्रम सम्पन्न भएको छ।
नगराइन नगरपालिका–२ मा आयोजित कार्यक्रममा स्थानीय नागरिक, स्थानीय तह, समुदाय, सामाजिक संस्था, तथा सञ्चारमाध्यमका प्रतिनिधिहरूको सहभागिता रहेको थियो।

कार्यक्रममा स्थानीयले शान्ति–सुरक्षा, प्रहरी सेवा तथा समुदायसँग जोडिएका विभिन्न विषयमा आफ्ना गुनासा, समस्या र सुझाव प्रहरीसमक्ष राखेका थिए। सहभागीहरूले प्रहरीसँग प्रत्यक्ष संवाद गर्दै स्थानीयस्तरमा देखिएका समस्याको समाधान तथा प्रहरी सेवा थप प्रभावकारी बनाउनुपर्ने विषयमा धारणा राखेका थिए।

कार्यक्रममा जिल्ला प्रहरी कार्यालय धनुषाले नागरिकका गुनासा तथा सुझावलाई प्राथमिकताका साथ सम्बोधन गर्ने प्रतिबद्धता जनाएको थियो। प्रहरी र नागरिकबीचको सहकार्य थप मजबुत बनाउँदै सुरक्षित र शान्तिपूर्ण समाज निर्माण गर्ने उद्देश्यले कार्यक्रम आयोजना गरिएको जिल्ला प्रहरी कार्यालय धनुषाले जनाएको छ।