​जनमत पार्टीको उपाध्यक्षमा डा. जयकान्त राउतको दाबी: संगठन पुनर्जागरण र संस्थागत विकासलाई प्राथमिकता दिने घोषणा ​

चन्दन रजक ,राजविराज :जनमत पार्टीको आगामी दोस्रो महाधिवेशनमा डा. जयकान्त राउतले राष्ट्रिय उपाध्यक्ष पदका लागि आफ्नो उम्मेदवारी घोषणा गरेका छन्। पार्टीलाई देशको बलियो र प्रभावकारी वैकल्पिक राजनीतिक शक्तिका रूपमा उभ्याउने सङ्कल्पसहित उनले उपाध्यक्षमा उम्मेदवारी दिएका हुन्।

​उम्मेदवारी घोषणा गर्दै नेता राउतले स्थानीय तहदेखि नै पार्टी संगठनलाई चुस्त र सुदृढ बनाउनु आफ्नो पहिलो प्राथमिकता हुने बताए। किसान, सीमान्तकृत, शोषित तथा उत्पीडित वर्गका समस्या र आवाजलाई राजनीतिको मूलधारमा स्थापित गर्न संगठन बलियो हुनुपर्नेमा उनले विशेष जोड दिएका छन्।

​दोस्रो महाधिवेशनलाई विगतको समीक्षा गर्दै आगामी राजनीतिक रणनीति तय गर्ने महत्त्वपूर्ण मोडका रूपमा व्याख्या गर्दै राउतले भने, “पार्टीलाई वैचारिक, सांगठनिक र पहिचानका हिसाबले थप सशक्त बनाउन महाधिवेशन प्रतिनिधिहरूले सही दिशा समात्नु आवश्यक छ।

​यसअघि पनि छोटो समयका लागि उपाध्यक्ष तथा संगठन विभाग प्रमुखको जिम्मेवारी सम्हालिसकेका राउतले आफ्नो विगतको अनुभवलाई आगामी कार्यकालमा संगठन हितमा पूर्ण रूपमा उपयोग गर्ने बताएका छन्।

​गत चैतको केन्द्रीय कमिटी बैठकबाट स्वीकृत ‘जनमत पुनर्जागरण महाअभियान (२०८३–२०८४)’ अन्तर्गतको ७०-बुँदे कार्ययोजना आफ्नै नेतृत्व र अग्रसरतामा अघि बढेको स्मरण गराउँदै उनले उपाध्यक्ष पदमा निर्वाचित भएपछि उक्त कार्ययोजनालाई पूर्णता दिने प्रतिबद्धता व्यक्त गरे।

​आगामी निर्वाचनलाई लक्षित गर्दै जनस्तरसम्म पार्टीको नीति पुर्‍याउने, संगठनमा अनुशासन कायम गर्ने र सामूहिक नेतृत्वको संस्कार बसाल्ने आफ्नो एजेन्डा रहेको बताउँदै राउतले महाधिवेशन प्रतिनिधिहरूसँग आफूलाई अमूल्य मतदान गरी विजयी गराउन अपिल गरेका छन्।