रसुवा बाढी : मृत्यु संख्या १७५ पुग्यो, २८ देशका ४७६ जना अझै बेपत्ता

काठमाडौं । चीनको तिब्बत क्षेत्रबाट आएको भीषण हिमपहिरो तथा त्यसपछि आएको भोटेकोशी–त्रिशूली बाढीमा परी मृत्यु हुनेको संख्या १७५ पुगेको छ भने २८ देशका ४७६ जना अझै बेपत्ता रहेको नेपालस्थित नेपाली दूतावास स्रोतले जनाएको छ ।

सरकारले बुधबार सार्वजनिक गरेको पछिल्लो विवरणअनुसार उद्धार तथा खोजी अभियान जारी रहेकाले मृतक र बेपत्ताको संख्या अझै परिवर्तन हुन सक्ने बताइएको छ । हाल सरकारको प्राथमिकता प्रभावित क्षेत्रमा खोज तथा उद्धार, सुरक्षित स्थानमा स्थानान्तरण र राहत वितरणमा केन्द्रित रहेको दूतावास स्रोतले जनाएको छ ।

राष्ट्रिय विपद् जोखिम न्यूनीकरण तथा व्यवस्थापन प्राधिकरण (एनडीआरआरएमए) का अनुसार रसुवा जिल्लामा शव फेला पर्ने क्रम जारी रहेकाले मृतकको संख्या बढिरहेको छ र शवहरूको पहिचान गर्ने काम भइरहेको छ ।

प्राधिकरणका प्रारम्भिक विवरणअनुसार नेपाल सेनाका ४४, नेपाल प्रहरीका २८ र सशस्त्र प्रहरी बलका १३ जना सुरक्षाकर्मी अझै सम्पर्कविहीन छन् । यस्तै, नेपाल पर्यटन बोर्डको प्रारम्भिक तथ्यांकमा ४६६ विदेशी र ११३ नेपाली गरी ५७९ यात्रुको अवस्था अझै अज्ञात रहेको उल्लेख छ । त्यसमध्ये रसुवाको टिमुरेबाट ९४ नेपाली र २९ विदेशी गरी १२३ जनालाई हेलिकोप्टरमार्फत सुरक्षित उद्धार गरिएको छ ।

तिब्बतको रसुवागढी नाकाबाट करिब २० किलोमिटर उत्तरपूर्वस्थित ल्हेन्दे खोलामा हिमनदी वा बरफको चट्टान खसेपछि ठूलो परिमाणमा माटो र ढुंगा मिसिएको बाढी आएको प्रारम्भिक निष्कर्ष निकालिएको छ । भोटेकोशी हुँदै रसुवागढी, टिमुरे र स्याफ्रुबेँसी पार गरेर त्रिशूली नदीमा मिसिएको बाढीले रसुवा, नुवाकोट, धादिङ, गोरखा र चितवनका नदी तटीय क्षेत्रमा ठूलो क्षति पु¥याएको छ ।

हालसम्म ३५ वटा मोटरेबल पुल, ४५ वटा झोलुङ्गे पुल र करिब ४० किलोमिटर कालोपत्रे सडक क्षतिग्रस्त भएको पुष्टि भएको छ । जलविद्युत् आयोजना, घर तथा अन्य पूर्वाधारमा भएको क्षतिको विस्तृत विवरण संकलन भइरहेको सरकारले जनाएको छ ।

उद्धारमा सेना, प्रहरी र हेलिकोप्टर परिचालन

प्रधानमन्त्री तथा मन्त्रिपरिषद्को कार्यालयका अनुसार नेपाल सेना, नेपाल प्रहरी र सशस्त्र प्रहरी बलले रातभर स्थलगत उद्धार अभियान सञ्चालन गरेका छन् । सैन्य तथा निजी क्षेत्रका हेलिकोप्टर परिचालन गरी टिमुरे र स्याफ्रुबेँसीमा फसेका नागरिकको उद्धारलाई तीव्र बनाइएको छ ।

जिल्ला अस्पतालदेखि काठमाडौंका प्रमुख अस्पतालसम्म चिकित्सकीय टोली परिचालन गरिएको छ । घाइतेको उपचार, अस्थायी आश्रय, खाद्यान्न, स्वच्छ खानेपानी र औषधिको व्यवस्था नेपाल सेनाको ब्यारेक तथा अन्य सुरक्षित स्थानमा गरिएको छ ।

भारतको राहत सहयोग

विपद्पछि भारतले तत्काल मानवीय सहायता उपलब्ध गराएको छ । नेपालका लागि भारतीय राजदूत नवीन श्रीवास्तवले संस्कृति, पर्यटन तथा नागरिक उड्डयनमन्त्री खड्गराज अधिकारीलाई १० टन राहत सामग्री हस्तान्तरण गरेका छन् । भारतीय प्रधानमन्त्री नरेन्द्र मोदीले प्रधानमन्त्री बालेन्द्र शाहसँग टेलिफोन संवाद गर्दै दुःख व्यक्त गरेका छन् र आवश्यक सबै मानवीय सहयोग गर्न भारत तयार रहेको बताएका छन् । भारतीय विदेशमन्त्री एस. जयशंकरले पनि भारतबाट मानवीय सहायता तथा चिकित्सकीय सामग्री काठमाडौं पुगेको र दुवै देशबीच समन्वय जारी रहेको जानकारी दिएका छन् ।