आज तराई मधेशमा जुडशीतल पर्व मनाइँदै।।

टुडेवाणी,संवाददाता,२ वैशाख,धनुषा । नयाँ वर्षको स्वागतमा तराई मधेश सहित मिथिलामा आज जुडशीतल पर्व मनाइँदै छ ।

प्रत्येक वर्ष वैशाख २ गतेका दिन बिहानैदेखि गाउँ गाउँमा आफूभन्दा सानोको टाउकोमा जल अर्थात पानी थपथपाएर आर्शीवाद दिने चलन रहेको छ।

आमा बुबा, गुरु,एवम् ज्येष्ठ नागरिकले आफूभन्दा सानोको शिरमा जल राखेर जल सिंचित गरी आर्शीवाद दिँदै पर्व मनाउने चलन छ ।

वर्षभरि शीतलता, सुख, समृद्धि, शान्ति, दीर्घायु एवम् उत्तरोत्तर प्रगति होस् भन्ने ठुलाबडा एवम् जेष्ठ नागरिकले आफूभन्दा सानालाई आशीर्वाद दिने गर्छन् ।

आजका दिन रुखविरुवामा पनि पानी हाल्नुको साथै खेतबारीमा मलजल गर्ने परम्परा छ ।

सूर्यको तापबाट आकुलव्याकुल मानवलगायत रुखविरुवालाई शीतलता प्रदान गर्नु यस पर्वको मूल उद्देश्य हो ।

नयाँ वर्षमा जल सिंचित गर्दा बालबालिकाको मस्तिष्क शीतल हुने र वर्षभरि नै उसले राम्रो काम गर्ने जनविश्वास रहेको छ ।