खोसियो हरिनारायण महतो को मेयर टिकट,राजाराम लाई उमेदवारको घोषणा ।

टुडेवाणी,डेस्क, बैशाख १२ गते,ढल्केवर।
धनुषा जिल्लाको मिथिला नगरपालिकामा नेकपा एमाले उम्मेदवार आइतबार मध्यरातमा परिवर्तित गरेको छ । मिथिला नगरपालिकाका निवर्तमान मेयर हरिनारायण महतोको सट्टामा पूर्व व्यावसायी राजाराम महतोलाई उम्मेदवार घोषणा गरेको छ ।

नेकपा एमालेका धनुषा जिल्ला अध्यक्ष समेत रहिसकेका हरिनारायण महतोले टिकट वितरणमा रातारात खेल भएको र सोमबार बिहानमात्र आफूलाई टिकट नदिएर राजारामलाई दिइएको जानकारी पाएको बताए ।

राजारामलाई हरिनारायणले नै पहल गरेर केही वर्षअगाडि नेकपा एमालेमा प्रवेश गराएका थिए ।

स्थानीय तह निर्वाचनका लागि नेकपा एमालेको मिथिला नगर कार्यसमितिले निवर्तमान मेयर हरिनारायणको एकल नाम सिफारिस गरेको थियो ।

मिथिला नगरपालिकाका मेयर उम्मेदवार परिवर्तनसम्बन्धी निर्णय एमालेका नेता रघुवीर महासेठको करबलमा भएको कार्यकर्ताहरुको भनाइ छ ।

यता हरिनारायण महतोले पार्टीको अकल्पनीय र स्तब्धकारी निर्णयबारे जानकारी प्राप्त भएपछि आफूहरू आकस्मिक बैठक गरिरहेको जानकारी दिए । उनले नेताकार्यकर्ता, आफ्ना समर्थक तथा शुभेच्छुकहरूका मनोभावअनुसार सबै वडामा उम्मेदवारी दिँदै स्वतन्त्रबाट मिथिला नगरपालिकामा मेयरमा लड्ने बताए ।

मेयर प्रत्याशीका रूपमा एमालेबाट आधिकारिक पत्र प्राप्त गरिसकेको जनाउँदै राजारामले आफू टिकट लिएर आइरहेको र समयभित्रमै नामांकन गराउने जानकारी दिए ।