महापर्व छठको दोस्रो दिन आज ‘खरना’ पर्व श्रद्धा र भक्ति पूर्वक मनाइँदै

जनकपुरधाम ९ कार्तिक । सूर्यदेवको आराधना र उपासना गरी मनाइने महापर्व छठको दोस्रो दिन आज ‘खरना’ पर्व श्रद्धा र भक्ति पूर्वक मनाइँदैछ ।

आज दिनभर निराहार व्रत बसेका ब्रतालुहरूले साँझ पवित्रता र विधिपूर्वक चामल, दूध र सक्खर मिसाएर तयार गरिएको खीर पकाई प्रसादका रूपमा ग्रहण गर्दै खरना सम्पन्न गर्छन् । सो खीर घरका सदस्यहरूलाई वितरण गरिन्छ भने केही स्थानमा छठ पर्व नमान्ने घरमा पनि प्रसाद स्वरूप बाँड्ने परम्परा रहेको छ ।

सन्तान र परिवारको सुख–समृद्धि तथा कल्याणको कामना गर्दै चार दिनसम्म चल्ने यो पर्व हिजो शनिबार ‘नहाय-खाय’ विधिबाट प्रारम्भ भएको थियो । सो दिन ब्रतालुहरूले नदी वा पोखरीमा स्नान गरी अरवा–अरबाइन भोजन ग्रहण गरेर आगामी कठोर उपवासको तयारी गर्छन् ।

भोलि सोमबार छठ पर्वको तेस्रो तथा मुख्य दिन साँझ अस्ताउँदो सूर्यलाई जलाशयमा अर्घ्य अर्पण गरिनेछ भने मंगलबार बिहान उदाउँदो सूर्यलाई अर्घ्य अर्पण गर्दै यो महापर्वको विधिवत समापन गरिनेछ ।

छठ पर्वमा बाँसका ढाकी, डगरी, माटोका कोसिया–कुरबार र हाँडी लगायतका सामग्री चढाइने चलन छ । ठकुवा, भुसुवा, केरा, उखु, हल्दी, अदुवा, विभिन्न मिठाई तथा फलफूल प्रसादका रूपमा अर्पण गरिन्छ ।

अर्घ्य दिने ब्रतालुहरू ४८ घण्टासम्म जलसम्म नखाई कठोर व्रत बस्ने परम्परा रहँदै आएको छ । पूर्ण नियम, निष्ठा र पवित्रताको साथ मनाइने भएकाले छठलाई अत्यन्तै कठोर र श्रद्धायुक्त पर्वका रूपमा मानिन्छ ।