परराष्ट्रमन्त्री खनालसँग साउदी अरबका राजदूत मनिखरको भेटवार्ता

काठमाडौं। परराष्ट्रमन्त्री शिशिर खनालसँग नेपालका लागि साउदी अरबका राजदूत फहद मोहम्मद ए. मनिखरले भेटवार्ता गरेका छन्।

परराष्ट्र मन्त्रालयमा आज भएको शिष्टाचार भेटमा नेपाल-साउदी अरब द्विपक्षीय सम्बन्ध, श्रम आवागमन, आर्थिक सहकार्य तथा साझेदारीका विषयमा छलफल भएको छ।

भेटमा साउदी अरबमा रहेका तथा कार्यरत नेपाली नागरिकको हित, कल्याण र उनीहरूलाई उपलब्ध गराइने कन्सुलर सेवासम्बन्धी विषयमा समेत विचार आदानप्रदान भएको जनाइएको छ।

यसैगरी भेटवार्तामा पश्चिम एसियामा भइरहेका पछिल्ला घटनाक्रमबारे पनि छलफल भएको परराष्ट्र मन्त्रालयले जनाएको छ।