जसपा–लोसपा एकीकरणको निर्णय, मधेस राजनीतिमा नयाँ मोड

काठमाडौं, पौष १३ — जनता समाजवादी पार्टी, नेपाल (जसपा) र लोकतान्त्रिक समाजवादी पार्टी, नेपाल (लोसपा) बीच पार्टी एकीकरण गर्ने सहमति बनेको छ। संघीय लोकतान्त्रिक गणतन्त्रात्मक व्यवस्थालाई संस्थागत गर्दै संघीयता, पहिचान र सामाजिक न्यायका मुद्दालाई अझ मजबुत बनाउने साझा उद्देश्यका साथ दुवै दल एक ठाउँमा आउने निर्णयमा पुगेका हुन्।

सोमबार काठमाडौंमा बसेको जसपा अध्यक्ष उपेन्द्र यादव र लोसपा अध्यक्ष महन्थ ठाकुरसहित शीर्ष नेताहरूको संयुक्त बैठकले देशको वर्तमान राजनीतिक अवस्था समग्र रूपमा समीक्षा गर्दै एकीकरणको निर्णय गरेको बताइएको छ।

बैठकले संघीयता, समानुपातिक समावेशिता, पहिचान तथा सामाजिक न्यायसँग जोडिएका उपलब्धिहरूलाई कमजोर बनाउने प्रयासहरू बढ्दै गएको निष्कर्ष निकालेको छ। यस्ता एजेन्डालाई प्रभावकारी रूपमा अघि बढाउन एकीकृत राजनीतिक शक्तिको आवश्यकता महसुस गरिएको जनाइएको छ।

नेताहरूका अनुसार पार्टी एकीकरणले मधेस केन्द्रित राजनीतिक आन्दोलनलाई नयाँ गति दिने, संघीय संरचनालाई बलियो बनाउने र न्यायपूर्ण समाज निर्माणतर्फ महत्वपूर्ण योगदान पुर्‍याउने विश्वास लिइएको छ। एकीकरणसम्बन्धी कार्यविधि, संगठनात्मक ढाँचा र नेतृत्व व्यवस्थापनका विषयमा आवश्यक प्रक्रिया छिट्टै अघि बढाइने जनाइएको छ।

राजनीतिक क्षेत्रका विश्लेषकहरूले यस एकीकरणलाई मधेस राजनीतिमा नयाँ दिशा दिने महत्वपूर्ण कदमका रूपमा मूल्याङ्कन गरेका छन्। यसले आगामी दिनमा राष्ट्रिय राजनीतिमा समेत प्रभाव पार्ने अपेक्षा गरिएको छ।