आज जानकीजी को मटकोर, भोली भव्य विवाहपञ्चमी

जनकपुरधाम ,मंसिर ८ :सप्ताहव्यापी विवाहपञ्चमी महोत्सवको पाँचौ दिन जनकपुरधाममा आज जानकीको मटकोर गरिँदैछ। दिउँसो धार्मिक तथा ऐतिहासिक तीर्थस्थल गंगासागरमा बाजागाजासहित जानकीको मटकोर सम्पन्न गर्ने कार्यक्रम तय गरिएको छ।

मिथिलाको परम्परा अनुसार राम र सीताको प्रतिकात्मक भूमिका रहेका बालबालिकामार्फत मटकोरको विधि पूरा गरिने छ। उपस्थित भक्तजनले मटकोरका गीत गाई वातावरणलाई अझै भक्तिमय बनाउनेछन्।

मटकोरदेखि अघि सरेपछि भोली मंगलबार जनकपुरमा भगवान राम र जानकीको डोला फेर गरी सोयम्बर तथा विवाहको विधि गरिने छ।

मंसिर ४ गतेबाट प्रारम्भ भएको सीताराम विवाहपञ्चमी महोत्सवको पहिलो दिन नगरदर्शन, दोस्रो दिन फुलवारी लीला, तेस्रो दिन धनुषयज्ञ, चौथो दिन तिलकोत्सव सम्पन्न भइसकेको छ।

आजको मटकोरपछि भोली छैटौँ दिन भव्य विवाहपञ्चमी र बुधवार जन्ती बनेर आएका साधु–सन्तको बिदाई अर्थात् ‘राम कलेवा’ गरी महोत्सव विधिवत् सम्पन्न गरिनेछ।