जनमत पार्टीका निलम्बित केन्द्रीय उपाध्यक्ष दीपक साहमाथि आफ्नै पार्टीकै केन्द्रीय सदस्यले कालोमोसो छ्यापे

असार२८- जनमत पार्टीका निलम्बित केन्द्रीय उपाध्यक्ष दीपक साहमाथि आफ्नै पार्टीकै केन्द्रीय सदस्यले कालोमोसो छ्यापेका छन्।

शुक्रबार रौतहटबाट सुरु भएको जनसंवाद यात्राका क्रममा शनिबार बिहान करिब ११ बजेतिर बारा जिल्लाको गढीमाई नगरपालिका–३, दहियाचोकमा साहमाथि मोसो प्रहार भएको हो। साहका अनुसार केन्द्रीय सदस्य विकास सिंहको नेतृत्वमा योजनाबद्ध रूपमा उक्त घटना भएको हो।

‘जनसंवाद यात्रामा खाना खाएर बाहिर निस्कँदै गर्दा अध्यक्ष सिके राउतका नजिकका विकास सिंहले मलाई कालोमोसो लगाए,’ साहले आरोप लगाए। उनले यात्राका कारण आफूलाई निरन्तर धम्की आइरहेको दाबी समेत गरे।

उपाध्यक्ष साह, कोषाध्यक्ष इन्जिनियर सुरेन्द्र नारायण यादव र केन्द्रीय सदस्य बिरेन्द्र साह सोनारको नेतृत्वमा सुरु गरिएको यो यात्राले पार्टीभित्र लोकतन्त्र सुदृढ पार्ने र अध्यक्ष डा. राउतको परिवारवादविरुद्ध आवाज उठाउने उद्देश्य लिएको उनीहरूको भनाइ छ।

उनीहरूले स्वतन्त्र मधेश आन्दोलनबाट पार्टी बनाउन योगदान दिएका नेताहरूमाथि डा. राउतले अनुशासनको नाममा कारबाही गर्ने र फसाउने गरेको आरोप पनि लगाएका छन्।

यसैबीच जनमतका अर्का केन्द्रीय सदस्य विपी साहले मोसो प्रकरणलाई लोकतान्त्रिक अभ्यासविपरीतको कदम भन्दै तत्काल छानबिन गरी दोषीलाई कारबाही गर्न माग गरेका छन्।