चितवनमा बुढी राप्तीमा गोहीको आक्रमणले एक युवकको मृत्यु

चितवन — चितवनको रत्ननगर–८ चित्रसारीस्थित बुढी राप्ती खोलामा माछा मार्ने क्रममा गोहीको आक्रमणबाट एक युवाले ज्यान गुमाएका छन्।

स्थानीय २७ वर्षीय अभिषेक माझी मंगलबार राति करिब ९ बजे ४५ वर्षीय राजकुमार माझीसँग माछा मार्न गएका बेला गोहीले तानेर लगेको जिल्ला प्रहरी कार्यालय चितवनले जनाएको छ।

गोहीले तानेर लगेपछि खबर पाउनासाथ रत्ननगर र मैनाहाका सुरक्षाकर्मीले खोजी थालेका थिए। खोजीका क्रममा राति १ बजेर २० मिनेट जाँदा घटनास्थलबाट करिब २ सय मिटर उत्तर खोलाको किनारमा अभिषेकको शव फेला परेको प्रहरीले जनाएको छ।

प्रहरीले बुढी राप्ती आसपासका बासिन्दालाई नदी किनारमा सावधानी अपनाउन अनुरोध गरेको छ।