प्रहरी भागेपछि आफै ट्राफिक व्यवस्थापन गर्दै विद्यार्थी

साउन २२,एजेन्सी । सरकार विरोधी उग्र प्रदर्शनका बिच बंगलादेशको राजधानी ढाकाका सडकमा ट्राफिक प्रहरी बेपत्ता भएका छन् । यस्तोमा अस्तव्यस्त सडक व्यवस्थापन गर्न विद्यार्थीहरू आफैँ सडकमा उत्रिएका छन् ।

ढाकाको कयौँ स्थानमा मंगलबार विद्यार्थीहरू सडकमा सवारी व्यवस्थापन गरेको दृश्य देखिए । बिहान ९ बजेदेखि नै मिरपुर क्षेत्रमा करीब २०० विद्यार्थी प्रहरी थाना, चर्च र मन्दिरमा सुरक्षार्थ खटिएका थिए । अघिल्लो रात मिरपुरमा प्रदर्शनकारीहरूको एक समूहले प्रहरी थाना जलाएर खरानी बनाएको थियो ।

बोगुरामा पनि विद्यार्थी र सर्वसाधारणहरूले सडकमा स्वयंसेवकको रूपमा काम गरिरहेका थिए । प्रदर्शनकारीहरूले बोगुरा सहरमा सदर प्रहरी थाना, सदर आउटपोष्ट र ट्राफिक प्रहरी कार्यालयमा आगजनी गरेपछि त्यहाँ सडकमा एक जना प्रहरी वा ट्राफिक प्रहरी देखिएका छैनन् ।